Prosjektleiar Rawia Awadallah
Nytt EU-prosjekt skal styrke utdanning og motstandskraft i Palestina og Ukraina
Forskingsprosjektet FORWARD skal gi studentar i Palestina og Ukraina praktiske verktøy for å styrke lokalsamfunna sin motstandskraft i møte med krig. Kunnskapen skal komme både deira eigne samfunn og andre krigsramma område til gode.
Det europeiske prosjektet Urban motstandskraft gjennom open vitskap, utdanning og samfunnsengasjement i krigsområde (FORWARD) får rundt 740 000 euro i støtte frå EU-programmet Erasmus+ for å styrke urban motstandskraft i Ukraina og Palestina.
Urban motstandskraft handlar om korleis byar og lokalsamfunn – frå enkeltpersonar til institusjonar og system – kan stå imot, tilpasse seg og fortsette å utvikle seg når dei står overfor kriser som krig og naturkatastrofar, samtidig som dei handterer utfordringar som energimangel, mangel på vatn, matsikkerheit og bustadbehov.
– Målet er å styrke evna lokalsamfunna har til å handtere kriser, bygge samfunnet for framtida og oppretthalde ei form for kvardagsliv, seier prosjektleiar Rawia Awadallah ved Institutt for arkiv-, bibliotek- og informasjonsvitskap.
Nettbasert opplæringsprogram
FORWARD skal lage eit nettbasert opplæringsprogram for studentar, forskarar og fagpersonar innan blant anna byplanlegging, krisehandtering, ingeniørfag, landbruk og IT ved både universitet og sivilsamfunnsorganisasjonar i Palestina og Ukraina.
Utdanningsprogrammet er basert på behova i Palestina og Ukraina, med tema som vassforvaltning, berekraftig energi, bustad og nødbusetting, matsikkerheit og likestilling.
Ein modul handlar om open vitskap og skal styrke kompetansen til studentane i heile forskingsdatasyklusen – frå innsamling til gjenbruk.
Støtte til utdanningsinstitusjonar krise
FORWARD involverer universitet i Gaza, på Vestbreidda og i Ukraina, og skal bidra til å bygge opp att utdanningssystema som er ramma av krig og øydelegging.
– Dette prosjektet er eit handslag til høgare utdanningsinstitusjonar prega av krig og okkupasjon, og gjev oss sjølve auka kunnskap om institusjonsberedskap i ei tid der dette også er påtrengande for oss, seier Oddgeir Osland, dekan ved Fakultet for samfunnsvitskap.
– Det er òg til inspirasjon for oss som arbeider for at norske universitet og styresmakter skal ta større ansvar for å støtte studentar, kollegaer og sivilbefolkninga i Palestina.
